野餐食物~可樂雞翼

近期教煮野食既節目真係厲害, 前一晚教煮第2日想買既材料都會一掃而空. 明明之前係一間連鎖店見到好多既韓國辣醬買, 肥媽一教完煮韓國菜隔日去,D辣醬已經無晒...唔怪之得咁多商品都喜歡贊助D飲食節目.

打算去郊遊順便野餐既我, 原本準備要做悶蛋~鹵水雞翼去食....點知想起肥媽做雞翼十味之後就決定準備帶可樂雞翼去野餐仲正, 仲方便過整鹵水雞翼呀出門前30分鐘煮定帶去野餐夠方便.

材料:
雞翼8隻(早一日可以俾少少鹽, 油, 生粉醃一醃,無醃亦可)
可樂半罐(其實任何汽水都可以)
老抽2湯匙
生抽1湯匙(如果無醃味就2湯匙)
薑2片

1)鑊加油爆香薑片後加入雞翼煎香2面
2)加入可樂, 生抽, 老抽用中火煮到雞翼熟
3)最後轉大火煮到醬汁濃稠即可.