馬卡龍BB出世啦( 附咖啡馬卡龍食譜)

我終於成功!!!!!!!!!!!!!!!!!!!!唔好講笑見到佢地長出裙邊果一刻真係覺得自己既親生BB出世一樣咁開心咁緊張...

你一定覺得我好誇張, 但你地想下由1年前開始整馬卡龍, 每星期日必整1次-4次.

有時會長出裙邊但焗唔熟, 好多時都係無裙邊焗熟又列表面等...總知有咩失敗既效果我都試唔少...我都唔知自己用左幾多盒糖粉, 幾多盒砂糖, 幾多包杏仁粉同雞蛋...

我真係可以自稱為馬卡龍失敗專家....不過中間都有流產風險. 當我焗到佢有裙邊時就再調低溫度, 可惜我個焗出風就太大火, 無風又唔夠溫度整得唔好, 第一次出爐入面唔夠熟, 所以當時都幾怕流產,好彩再入爐焗多一陣再關火焗多一回好似又熟啦..但到起馬卡龍時又係另一個流產風險...中間都有1,2個俾我整爛左...幸好最好都保存餘下馬卡龍BB.

今次無準備佢會成功之下既成功, 所以餡料都係用左朱古力醬就算...大家可能會覺得我一定好瘋狂喜歡食馬卡龍啦, HAHAHAH...錯我唔算喜歡食,只係喜歡整下...相信今次之後我都會好長時間唔會再整馬卡龍啦...

食譜更係要寫低啦...

材料:
蛋白 25G
糖 25G
糖霜40G
杏仁粉30G
可可粉/咖啡粉/任何想增加味的粉 5G(不加原味亦可)

1)先將杏仁粉及糖霜放入磨粉機再磨更幼細過篩
2)蛋白先打起泡分3次加入糖打至蛋白堅挺起勾(這一部一定要做好, 我發現我咁多次失敗既原因都係這步)
3)最後加入1的材料小心攪勻有光澤
4)放入唧袋, 每個唧大約5元SIZE
5)放係涼處吹乾表面(我一般開風扇吹30分鐘-1小時都見未乾晒, 就會用風筒吹乾, 唔吹乾係起唔到裙邊)
6)開150度焗爐, 放入馬卡龍後即轉120度焗3分鐘左右/起裙邊就改110度7分鐘關火焗5分鐘(大家焗爐唔同, 見到底部好似仲濕濕地就應該110度再焗多2-3分鐘關火再焗多幾分鐘.

其實我真係搵左好多個食譜跟, 但我自己反而覺得這個食譜既爐溫比較岩我家中既爐用...